Pobal na Gaeilge i mbun léirsithe ag Cnoc an Anfa ar lorg chur i bhfeidhm Acht Gaeilge faoi dheireadh thiar thall

Agus deireadh tagtha leis an tréimhse is déanaí de chomhchainteanna comhroinnte cumhachta ó thuaidh, chuaigh pobal na Gaeilge chun sráide arís eile inniu (27/3/2017) chun éileamh ar na páirtithe cur i bhfeidhm Acht Gaeilge a chomhlíonadh faoi dheireadh thiar thall.

Bhailigh grúpaí Gaeilge, teaghlaigh agus daltaí Gaeilge ó scoileanna áitiúla le chéile taobh amuigh de Chnoc an Anfa, áit ar bhuail siad le hionadaithe tofa agus CTR nua-thofa atá ag tacú leis an fheachtas.

Is iad An Dream Dearg a d’eagraigh feachtas na lae inniu, mar ghréasán oscailte feachtasaíochta do phobal na Gaeilge, ar lá deiridh na gcomhchainteanna leis an éileamh ar son Acht Gaeilge a chur chun tosaigh arís eile, bunaithe ar reachtaíocht cheart-bhunaithe.

Dúirt Ciarán Mac Giolla Bhéin, urlabhra do An Dream Dearg:

Tá an tAcht Gaeilge luaite go soiléir mar cheann de na míreanna sna comhchainteanna seo nach bhfuil réiteach air go fóill. Tá seo amhlaidh in ainneoin tromlach soiléir de CRT nua-thofa atá anois ag tacú lenár n-éileamh ar son reachtaíochta cheart-bhunaithe Gaeilge, agus 50 as an 90 CTR nua-thofa ag teacht leis an bhun-éileamh reachtaíochta seo go poiblí.

Iarrann muid ar na hionadaithe nua-thofa sin ar fad, mar aon le Rialtas na hÉireann, a bhfuil dualgas lárnach orthu mar chomh-shínitheoirí ar na comhaontaithe inar gealladh Acht Gaeilge, beart de réir briathar a dhéanamh agus le cinntiú nach ndéanfar aon socrú nach gcinntíonn cearta Gaeilge tríd Acht Gaeilge.

In ainneoin freasúra ó na páirtithe aontachtacha agus éirí as á ndualgas ag Rialtas na Breataine, níor cheart go mbeadh ár gcearta faoi chúram ‘chomhréiteach polaitiúil’.

Dúirt Katie McGreal, urlabhra do An Dream Dearg: “Tá pobal na Gaeilge, tríd An Dream Dearg, ar na sráideanna arís chun ár gcearta á éileamh. Leanann léirsiú an lae inniu sraith d’agóidí poiblí ó thuaidh, ó Iúr Cinn Trá go Doire, ach an uair seo níor mhór dúinn an troid a thabhairt go Cnoc an Anfa.

“Agus deireadh tagtha le comhchainteanna leis an fheidhmeannas a chur ar obair arís, éilíonn muid orthu siúd atá ag tacú lenár bhfeachtas gan dul isteach in aon chomhrialtas nua gan chearta Gaeilge bheith réitithe faoi dheireadh thiar thall.”