In 1998, gealladh ré úr chomhionannais do phobal na Gaeilge leis na coimitmintí uaillmhianacha i dtaca leis an teanga i gComhaontú Aoine an Chéasta. Gheall Rialtas na Breataine go ndéanfadh siad ‘gníomh diongbháilte’ chun an Ghaeilge a chur chun cinn.

Dhaingnigh Rialtas na Breataine an Chairt Eorpach um Theangacha Réigiúnacha nó Mionlaigh maidir leis an Ghaeilge sa bhliain 2001. Cuireadh dualgas orthu gealltanais éagsúla i leith na teanga a chur i bhfeidhm sa saol cultúrtha, sóisialta agus eacnamaíoch, in údaráis riaracháin, sna meáin, i gcúrsaí oideachais agus i seirbhísí trasteorann.

Tháinig Comhaontú Chill Rìmhinn sna sála ar thréimhse ocht mbliana nár comhlíonadh geallúintí a rinneadh i gComhaontú Aoine an Chéasta lena linn.

In 2014, bhí neart cainte ann faoi choincheap an Achta Gaeilge. In éagmais reachtaíochta, léirigh Aontachtóirí áirithe dímheas agus aineolas i leith phobal na Gaeilge agus choinnigh siad ar an imeall sinn. 

I dtoghchán na bliana 2016, ceapadh comhalta tofa de chuid an DUP (Peter Weir) mar Aire Oideachais den chéad uair riamh. Díreach i ndiaidh dó theacht isteach sa ról, baineadh an téacs Gaeilge uilig ó shuíomh gréasáin na Roinne agus leanadh leis an chineál sin dímheasa ar an Ghaeilge agus ar lucht a labhartha an chuid eile den bhliain.

Níorbh aon timpiste é an dóigh ar fógraíodh giorruithe Líofa. Rinneadh é go díreach roimh bhriseadh na Nollag, leis an Roinn ag súil nach mbeadh raic ann faoi agus go ndéanfadh daoine dearmad air thar thréimhse na Nollag.

Ba dhul chun cinn suntasach é foilsiú na reachtaíochta ‘Ré Nua, Cur Chuige Nua’ i mí Eanáir 2020 agus ba thoradh é ar an fheachtasaíocht a bhí ag dul ar aghaidh ag leibhéal an ghnáthphobail ar feadh na mblianta.

I mí an Mheithimh 2021, rinne Rialtas na Breataine coimitmint go poiblí go dtabharfar isteach an reachtaíocht teanga a gealladh i mí Eanáir 2020 tríd Westminster i mí Dheireadh Fómhair 2021 muna ndéanfaidh Feidhmeannas an Tuaiscirt amhlaidh fá mhí Mheán Fómhair 2021.

An reachtaíocht teanga os comhair Westminster