Pobal na Gaeilge ‘a bhrú go cúl an bhus’ i mórionad taistil nua

Córas Béarla amháin a bheidh i lárionad taistil nua i mBéal Feirste.

Weavers Cross amháin a thabharfar ar an bhforbairt nua in ainneoin go raibh Comhairle Cathrach Bhéal Feirste agus lucht feachtais ag éileamh go mbeadh brandáil agus comharthaíocht i nGaeilge le feiceáil sa mhol nua.

Ghlac Comhairle Cathrach Bhéal Feirste i mí Aibreáin le rún ag éileamh comharthaíocht Ghaeilge ag an mhol iompair nua ‘Weaver’s Cross’ nó ‘Cros na bhFíodóirí’ atá le hoscailt i lár na cathrach.

Éilíodh sa rún a ritheadh sa Chomhairle chomh maith go mbeadh comharthaíocht dhátheangach le feiceáil sa stáisiún agus sa cheantar timpeall air.

Mhol an Chomhairle do Translink, atá i mbun na forbartha, go gcuirfí comharthaíocht dhátheangach laistigh agus lasmuigh den stáisiún bus agus traenach nua a bhfuil na céadta milliún á chaitheamh air agus atá á thógáil ar shuíomh stáisiún Europa.

Bhunaigh an Dream Dearg feachtas ag iarraidh go mbeadh comharthaíocht dhátheangach le feiceáil ag suíomh an lárionaid taistil nua.

Dúirt Padaí Ó Tiarnaigh, urlabhraí ó An Dream Dearg, go raibh díomá mhór orthu faoi chinneadh Translink córas aonteangach Béarla a chur i gcrích sa lárionad nua “atá lonnaithe ar imeall na Ceathrún Gaeltachta i mBéal Feirste, ag Cros na bhFíodóirí”.

“Tá neamhaird iomlán déanta ag Príomhfheidhmeannach Translink ar an chás láidir a cuireadh ina láthair, ar an tacaíocht a fuarthas ó Chomhairle Cathrach Bhéal Feirste, ar an tacaíocht a thug an tAire Bonneagair don chur chuige dátheangach, ar an chomhairle a thug Foras na Gaeilge di agus ar an éileamh soiléir a rinne breis agus 20 grúpa Gaeilge sa chathair níos luaithe i mbliana,” arsa Padaí Ó Tiarnaigh.

“D’ainneoin sin ar fad, agus an rogha curtha os a gcomhair, thaobhaigh Translink le cur chuige aonteangach, atá ag teacht salach ar dhualgais s’acu de réir na Cairte Eorpaí do Theangacha Réigiúnacha agus Mionlaigh.”

Dúirt Ó Tiarnaigh gur mhó a d’oirfeadh “an ollphéist aonteangach” seo do stát an Tuaiscirt i 1924 seachas in 2024.

“Tá réamhshampla anois ag Translink gur féidir comharthaíocht dhátheangach chuimsitheach a chur in airde i lárionaid taistil dá gcuid, agus sin déanta acu i mórstáisiún traenach in Iúr Chinn Trá tamall de bhlianta ó shin. Ní ligfidh muid do Translink pobal na Gaeilge a bhrú go cúl an bhus. Tá muid ag éileamh ar an Aire Bonneagair anois idirghabháil oifigiúil láidir a dhéanamh agus treoir aire a thabhairt do Translink cur chuige cuimsitheach dátheangach a chur i bhfeidhm.

“Tá an chumhacht ag an Aire sin a dhéanamh agus ní mór dó anois an chumhacht sin a úsáid.”