“NÍ MÓR DON AIRE TREOIR OIFIGIÚIL A THABHAIRT DO TRANSLINK SOLÁTHAR DÁTHEANGACH A CHUR IN AIRDE SAN IONAD ÚR TAISTIL I MBÉAL FEIRSTE”

Bhí pobal na Gaeilge agus daltaí ó Ghaelscoileanna áitiúla, Coláiste Feirste ach go háirithe, ag agóid inniu ar son na comharthaíochta dátheangaí san Ionad Úr Taistil a osclaíodh ag tús na seachtaine seo i mBéal Feirste.

Dúirt Eoghan Ó Gairmile, urlabhra ó An Dream Dearg:

“Bhí díomá ollmhór orainn nuair a seoladh an t-ionad úr taistil Dé Luain gan aon chomharthaíocht dhátheangach. Tá pobal na Gaeilge ag plé le Translink agus an Roinn Bonneagair ar an cheist seo ó bhí 2022 ann agus d’éiligh muid orthu seo a shocrú i bhfad roimhe seo, sa dóigh is nach mbeadh orthu nó orainn plé leis an argóint go mbeadh costas breise le híoc chun an Ghaeilge a chur leis na comharthaí seo a athrú sa todhchaí. Tá Translink i ndiaidh leithscéal i ndiaidh leithscéil a thabhairt dúinn ar an cheist seo. Ar tús, ní raibh siad sásta plé leis seo gan chomhairle nó treoir ón Aire. Ansin nuair a chuir an tAire comhairle ar fáil, dúirt siad nach raibh siad ábalta aon rud a dhéanamh gan treoir ón Choimisinéir Gaeilge, ról nach bhfuil an folúntas fiú fógartha dó fós. Sa bhreis ar chomhairle an Aire, ghlac Comhairle Chathair Bhéal Feirste le rún ag éileamh an tsoláthair dhátheangaigh chéanna, agus bhí Foras na Gaeilge, Conradh na Gaeilge agus breis agus 20 grúpa áitiúil ag éileamh ar an Roinn agus ar Translink an Ghaeilge a chur san áireamh go cuimsitheach.

“Bímís iontach soiléir anseo, sáraíonn cur chuige ‘Béarla Amháin’ Translink An Cháirt Eorpach do Theangacha Réigiúnacha agus Mionlaigh, Cáirt atá daingnithe ag an Rialtas i Westminster agus atá luaithe go sonrach i bpolasaí Gaeilge na Roinne Bonneagair. Tá cinneadh tógtha ag Translink cloí leis an chur chuige aonteangach seo in ainneoin gur cuireadh réimse leathan tacaíochta ar fáil ón Chomhairle áitiúil, ón Aire agus ón phobal. Sin ar fad curtha san áireamh, ní aon mhuinín againn go mbeidh athrú poirt ar Translink gan treoir láidir ón Aire. Chuige sin, is treoir láidir ón Aire atá anois de dhíth. Níor cheart go mbeadh ‘veto’ ag Translink ar chearta teanga s’againn. Céad slán leis an ollpheist aonteangach a raibh costas £340bn leis agus cuirimís fáilte roimh ionad iontach dátheangach a léiríonn meas ar na mílte Gaeilgeoirí fud fad an oileáin seo. ”

Níos luaithe i mbliana:

• Ghlac Comhairle Chathair Bhéal Feirste le rún ag éileamh ar Translink comharthaíocht dhátheangach a chinntiú sa lár-ionad taistil nua ag Cros na bhFíodóirí;
• Chuir an tAire in iúl go dtacaíonn sé leis an fheachtas ar son na comharthaíochta dátheangaí seo san ionad;
• Bhronn breis agus 20 grúpa Gaeilge i mBéal Feirste litir phoiblí ar an Aire ag éileamh air an socrú dátheangach a bhaint amach, ag teacht leis an soláthar dátheangach atá i bhfeidhm cheana féin i staitiúin traenach Iúr Cinn Trá, faoi chúram Translink; https://x.com/dreamdearg/​status/1773027499791851558
• Bhuail toscaireachtaí ó Chonradh na Gaeilge agus ó Fhoras na Gaeilge le Príomhfheidhmeannach Translink Chris Conway chun an cás ar son na comharthaíochta dátheangaí a dhéanamh leis.