Stailc ar fud na tíre ar son mhaoiniú na Gaeilge

Chuaigh breis agus 40 grúpa Gaeilge ar stailc ar feadh ceithre huaire an chloig ar fud na tíre inniu chun aird a tharraingt ar an gconspóid faoi mhaoiniú eagraíochtaí Gaeilge.

Chuir baill de na grúpaí Gaeilge picéid ar n-oifigí féin idir 9 a chlog ar maidin agus 1 a chlog am lóin lena míshásamh faoina bhfuil ar bun ag roinnt polaiteoirí a léiriú.

Baineann an scéal leis an laghdú de thart ar €820,000 ar bhuiséad Fhoras na Gaeilge a fógraíodh ag deireadh na míosa seo caite agus faoin laghad maoinithe a chreideann na grúpaí Gaeilge a chuirtear ar fáil don Fhoras go ginearálta.

Bheartaigh an Foras deireadh ar fad a chur le tograí áirithe agus tograí eile a ghearradh siar mar gheall ar an laghdú ar bhuiséad na heagraíochta.

Is cosúil gur coistí beaga agus eagraíochtaí pobail is mó a bheas thíos leis agus deirtear go bhfuil baol mór ann nach mbeidh cuid acu in acmhainn cíos a íoc feasta.

Bunaíodh Foras na Gaeilge faoi Chomhaontú Aoine an Chéasta 1998 agus fearacht fhorais eile trasteorann, tagann 75% de chiste an eagrais ó Rialtas na hÉireann agus 25% ó Fheidhmeannas Stormont.

Tá modh nua maoinithe socraithe le bonn níos láidre a chur faoin bhForas ach níl sé curtha i bhfeidhm ag Feidhmeannas Stormont fós mar nach bhfuil an DUP sásta glacadh leis.

Tá na grúpaí Gaeilge ag éileamh ar Rialtas na hÉireann agus ar Rialtas na Breataine araon idirghabháil a dhéanamh sa scéal agus maoiniú na hearnála Gaeilge a mhéadú agus a dhaingniú.

Is iad na grúpaí a bhí ar stailc inniu An Bruach Thoir, Gaillimh; An Ceathrú Póilí, Aontroim; An Droichead, Aontroim; An Siopa Leabhar, Baile Átha Cliath; Áras Chrónáin, Baile Átha Cliath; Baile Seirbhíse Gaeltachta An Chlocháin Léith, Dún na nGall; Bia Loch Lao, Aontroim; Cairde Uí Néill, Tír Eoghain; Cathair Saidhbhín le Gaeilge, Ciarraí; Comhaltas Ceoltóirí Éireann Dhún Lathaí, Aontroim; Cill Dara le Gaeilge; Coiste Forbartha Charn Tóchair, Doire; Comharchumann Forbartha Chorca Dhuibhne, Ciarraí; Conradh na Gaeilge, Náisiúnta; Conradh na Gaeilge Boirche Íochtar, An Dún; Cultúrlann Mac Adam Ó Fiaich, Aontroim; Cultúrlann Uí Chianáin, Doire; Cumann Cultúrtha Mhic Reachtain, Aontroim; Cumann Óige Uachtar Chluanaí, Aontroim; Cumann na bhFiann; Dúchas an Daingin, Ciarraí; Dún Garbhán le Gaeilge; Fís an Phobail, Aontroim; Fóram na nÓg, Aontroim; Gaeil na nGlinntí, Aontroim; Gaeil Ruairí Óig, Aontroim; Gaelphobal Ard Mhacha Theas; Glór Mhachaire Fíolta, Doire; Glór na Maoile, Aontroim; Glór na Móna, Aontroim; Glór na nGael; Glór na Speiríní, Doire; Glór Uachtar Tíre, An Dún; Ionad na Fuiseoige, Aontroim; Ionad Uíbh Eachach, Aontroim; Líonra Leitir Ceanainn, Dún na nGall; Meitheal Pleanála an Iarthuaiscirt, Dún na nGall; Muineachán le Gaeilge; Oireachtas na Gaeilge; Tobar Dhuibhne, Ciarraí; agus Turas, An Dún.