Gradam Oireachtais bronnta ar an Dream Dearg

Comhghairdeas! Mura bhfuil tú ar an eolas cheana féin, bronnadh gradam ar an Dream Dearg as an fheachtas iontach, spreagúil #AchtAnois ag Oireachtas na Samhna in CityWest i mBaile Átha Cliath an tseachtain seo caite.

Thug muid linn an Gradam d’Fheachtas Meán Sóisialta na Bliana, 2019. Nuair a deirim ‘linn’, tá mé ag caint ar na mílte as measc phobal na Gaeilge a rinne gníomhartha den iomaí cineál le trí bliana anuas chun cearta, cothromas agus cóir, agus acht Gaeilge, a éileamh – daltaí, múinteoirí, príomhoidí, tuismitheoirí, cúramóirí, oibrithe óige, lucht na n-eagraisí Gaeilge agus eile. Gach seans, a léitheoir, go bhfuil tusa ina measc. Mar sin, comhghairdeas ó chroí leat!

Nuair a bronnadh an lóchrann ag ócáid na gile agus na galántachta oíche dhorcha ag deireadh an fhómhair, is ar gach uile mhac agus iníon mháthar bheo a rinne gníomh ar son a gcearta teanga a bronnadh í. Aitheantas atá ann, ónár lucht tacaíochta ar fud na hÉireann, do gach duine a chuaigh amach ar na sráideanna i mBéal Feirste, i nDoire, ar an Iúr, ar Chnoc an Anfa, in Hillsborough chun a éileamh go gcomhlíonfar an gealltanas a rinneadh i gComhaontú Chill Rìmhinn in 2006 go dtabharfaidh an rialtas acht Gaeilge isteach.

Seo gradam daoibhse uilig a chuir grianghraif ar Facebook, Twitter, Instagram, Snapchat i dtaca leis an fheachtas nó a rinne ‘is maith liom-áil’ ar phostálacha nó a chraobhscaoil iad ar na hardáin éagsúla.

Is gradam é don uile pháiste, múinteoir agus príomhoide a mhaisigh bhur scoileanna le póstaeir lámhdheanta den fháinne bhán ar chúlra dearg nó a d’eagraigh busanna le daltaí a thabhairt a fhad leis na láithreacha léirsithe. Gradam atá ann fosta do na páistí gaelscoile a thaifead amhrán Nollag dhá bhliain ó shin, ‘Ba mhaith liom Acht na Gaeilge don Nollaig’ a craoladh ar Nuacht TG4.

Gradam atá ann do na ceannairí óige agus do na céadta daltaí a shuigh ar an urlár san fháiltiú in oifigí an Údaráis Oideachais i Sráid an Acadaimh go dtí go bhfuarthas maoiniú na gcumann óige Gaeilge ar ais. Agus ná ligimis i ndearmad na tuismitheoirí, na seantuismitheoirí agus na cúramóirí.

Sibhse a phostáil nascanna chuig ailt agus míreanna teilifíse agus raidió, is daoibhse an gradam seo. Comhartha aitheantais atá ann fosta d’urlabhraithe an fheachtais a chuireann an cás chun cinn go sciliúil, muiníneach ar chláir nuachta agus chúrsaí reatha.

Is é duine de na hurlabhraithe sin, Pádraig Ó Tiarnaigh, atá ag obair le Conradh na Gaeilge, eagras atá ag tacú go mór leis an fheachtas ón chéad lá, a ghlac leis an ghradam ar son an Dreama Dheirg. Is í Katherine Licken, Ard-Rúnaí na Roinne Cultúir, Oidhreachta agus Gaeltachta a bhronn é agus ceol mórga ‘Mise Éire’ le Seán Ó Riada á sheinm sa chúlra. Dúirt Pádraig ón ardán:

“Cé a cheap nuair a baineadh sparánachtaí Líofa ó dhream na gcoláistí samhraidh in 2016 go mbeimis inár seasamh anseo trí bliana ar aghaidh agus feachtas dochreidte ar an fhód againn ó shin. Nílimid ag dul áit ar bith. Gheall muid do phobal na Gaeilge go mion agus go minic go mbeimis ag úsáid na meán sóisialta, fuinneamh ár bpobail féin, chun cearta a bhaint amach don phobal ó thuaidh. Ní ghlacfaimid le sop in áit na scuaibe. Ní chaithfear linn mar shaoránaigh den dara grád a thuilleadh. Agus ní bheadh seo indéanta gan na scórtha agus na céadta de ghníomhaithe nua Gaeilge atá ag teacht chun tosaigh chun seilbh a ghlacadh ar thodhchaí s’againn féin. Ní neart go cur le chéile! Acht anois!”